呃飲呃食上天家－－ 第廿六集《五十日同行世界》第8節

我的主對我說：「起來，上路。」

呃飲呃食上天家--- 第廿六集 五十日同行世界
第八節 夢幻的一天

返到香港，我繼續生活。我既兄弟話比我知佢間學校請人，於是我send個履歷過去，但係經歷澳門一役之後，我已經打定要九月頭先搵到，個人開始輕散兼懶散，仲諗住九月揹個背囊去個旅行添。

見今次份工，其實無乜準備，可能之前已經預備左啦，ｄ野仲記係個腦度，淨係上去間學校個網睇睇。

八月廿五號，因為小弟計算錯誤，早左四十五分鐘去到學校。等到九點半，校長先見我。一坐低，校長就同我講唔好意思，因為做緊野，所以要我等左咁耐。Wait，其實係我早到阻住佢，say sorry應該係我（當然我亦付諸實行）；再wait，點解個情境咁熟口面既？

可能我兄弟已經幫我見左一半工，校長同我似傾計多過面試，問我工作既野都只係一兩句，問得我最多既，竟然係──我係教會既事奉。可能間學校係基督教學校卦，佢仲話可以係學校帶學生團契。吓？比我係見工個時躂到我上帝同我教會個朵，我已經好開心啦喎；化灰都無諗過有校長問我少年事工ｄ野，我以為少年事工只係係教會做，無諗過我教會既事奉同我既工作有個等號（＝）喎。

再講講下講到人工個方面，佢話驚比唔返我依家個point，唉，做合約教師咁耐唔通唔知點玩咩，我同校長講比返起薪點都ok架啦，點知校長反應好大（大到我到差ｄ比佢嚇親）咁講：「我地無咁無良，等我計下個人工先。」我聽完之後好想笑好想拍手掌，仲想叫佢講多一次，等我錄埋音掟比天主教個間聽。

In完之後，佢就安排我入教員室坐，等等，一直都無話請我架喎，不如比我返去等消息啦，叫我坐響度做乜呀。我戇居居坐響度坐到十一點幾，校長叫我跟住佢，入到會議室，見到有幾個老師坐響度，校長同我講「佢地開緊會，你一齊開啦。」吓？咩事呀？係咪面試既一部分黎架？又無話請我仲乜要我開會？搲晒頭又開左一個會。之後就食晏下晝開全體會（後尾先比份約我簽）。

我收工之後，已經懵下懵下，全日都唔知發生緊咩事，好似發緊夢咁。十二個鐘都唔夠已經由待業變成就業，仲已經開緊工個隻。發生咩事呀？

我既上帝嫌唔夠爆，收工之後，我仲收到個電話，嘩！打死都估唔到──之前間天主教學校話有合約位，問我做唔做。個一刻，我已經產生左兩項個人紀錄：
1) 第一次係同一日有兩份工請我。
2) 第一次向同一間學校推工兩次。

收線之後，我有種「吐氣揚眉」既感覺。還記得第六節《與我常在》講過，如果間天主教學校請我做唔做，我回應：「唔做。但我無第二間揀，為左生活，我會做。有得揀，一定唔做。」第一次上帝利用我既「弱點」（人工低）幫我推左；到今次已經簽左約喇，唔推唔得。

好野好野，上帝完全知我點諗，無野好講。

比亞零八
200809291827