呢篇(原著於20070616，於20070813修改，特此為記)……可能會引起不安，尤其係教育界個班，敬請留意。
呃飲呃食上天家 第二十一集---一錢銀子的協定(馬太福音20 : 1-13)
岩岩過左既星期六，上千名教師遊行，反對政府調整津校教師薪酬同時，漠視教師年資，任職四年既教師薪酬將與新入職者相同。他們既理據係二千年起入職既學位教師因政府調低入職起薪點至十四點，至今年經濟改善，教師入職起薪點調升至十九點，正好係入職四年既教師現時既薪酬，於是佢地認為，年資不受承認，對教師造成傷害，製造不公平，會造成教師隊伍分化和不滿，破壞教育的穩定，要求公務員事務局按教師年資增薪。
小弟睇完呢段新聞，忽然想起馬太福音二十章1-13節提及既葡萄園工人既比喻：
「因為天國好像家主，清早去雇人，進他的葡萄園作工。和工人講定，一天一錢銀子，就打
發他們進葡萄園去。
約在巳初出去，看見市上還有閒站的人。就對他們說，你們也進葡萄園去。所當給的，我必
給你們。他們也進去了。
約在午正和申初又出去，也是這樣行。
約在酉初出去，看見還有人站在那裡。就問他們說，你們為甚麼整天在這裡閒站呢？他們
說：因為沒有人雇我們。他說：你們也進葡萄園去。
到了晚上，園主對管事的說，叫工人都來給他們工錢，從後來的起，到先來的為止。約在酉
初雇的人來了，各人得了一錢銀子。及至那先雇的來了，他們以為必要多得，誰知也是各得
一錢。
他們得了，就埋怨家主說：我們整天勞苦受熱，那後來的只做了一小時，你竟叫他們和我們
一樣麼。家主回答其中的一人說：朋友，我不虧負你。你與我講定的，不是一錢銀子麼？拿
你的走罷。我給那後來的和給你一樣，這是我願意的。」
當然呢段經文本身係講救恩既問題，不過套用係這段新聞上，其實又好合用。我明白到個班教師既不忿，第一因為自己捱左幾年，依家一調節薪酬，竟然新入職同自己相同，一定爆口「有冇攪錯！」；第二，小弟也是2000年後入職個批，兼且有四年年資；第三，十四點起薪同十九點起薪相差成幾千蚊，個心梗係覺得唔抵。
雖則小弟都係同行，但我唔覺得唔公平，亦唔明白班教師有乜理據去話政府。第一根據葡萄園個比喻：一早大家講好左係一錢銀子入園子做野架喎，園主無呃你，你又應承個報酬──正如個班當時新入職既教師，政府講好左係十四點起薪，一直都無比少個崩你架，而你當時入職個時係知道已經調低左，如果你覺得人工唔合理，你大可以唔做，咁有乜理據要嘈？
第二，政府又唔係唔計你年資無跳point比你，係薪酬上面一直跟規定做野，照計年資照跳point；依家只不過係一般薪酬調整之嘛，老細要調節起薪點，又關你乜野事呢？
現今好多人為左維護自己利益，往往打正所謂「公平、公正」旗號，其實公平係咪代表每個人都要一樣，咁如果每個人都要食同一碟飯，就係公平，對於食量差嘅人，食一碟飯就太辛苦喇，甚至係虐待；但係對於嗰ｄ食量大嘅人，食一碟又唔夠，又覺得係虐待。公平？可能只係按自己嘅需要啫。
係信仰上面，我哋時都覺得上帝唔公平，點解人哋有，我冇，但係就唔記得問自己－－有冇盡咗我答應神嗰部份先，好似公錢係大家傾好，神做咗祂的，但自己有冇做好自己嗰部份呢？可是好多人冇諗清楚自己嘅負責，就認定上帝唔公平。
神嘅公平，就係依我哋各人嘅不同，而比我哋，滿足我哋嘅需要，所以唔需要眼紅人哋，而忘記咗自己嘅需要神係知道，神亦都唔會苦待人。不如大家唔好只係睇人哋嘅成就，人哋嘅能力，人哋已經有嘅，不妨碌大自己對眼，睇下自己所有，諗下自己點樣蒙恩啦。
各位老師，無論薪酬點樣，都唔會改變你哋對學生嗰份熱心，雖然人工相比少咗，但確實賺咗很多寶貴經驗，呢ｄ經驗就算政府點無賴都攞唔走你嘅，唔好打擊自己個信心呀！
比亞零七
200708132322
