今集講愛 , 都算一大突破 , 因為呢part係小弟最弱個環 . 愛 , 不單單指愛情呀 , 仲有與長輩之間 , 兄弟姊妹之間 , 朋友之間 , 人與人之間嘛 , 做人唔好咁窄至得格 .
呃飲呃食上天家---第十六集 從電腦中尋找愛與被愛？
早個幾日同個朋友食飯 , 大家言談之間講到電腦科技話就話拉近人與人之間既距離 , 實際係令人更加疏離 . 佢話依家既人 , 消閒娛樂購物睇戲聽歌識朋友傾心事 , 乜都係匿係間房度 , 靠部電腦就攪掂 , 生活越黎越封閉 , 連基本同人溝通既技巧都唔識 . 我同佢講 , 依家好多人都覺得 : 朋友係出黎飲飲食食 , 講心事係會被出賣 ; 所以就算要講 , 上網係d乜鬼messanger度求其篤個人出黎 , 大家三唔識七 , 乜都亂up , 就算講講自己想講既心事 , 唔駛負責任又唔怕佢出賣自己 . 佢好大反應咁話 : 咁好疏離啫 ! 我話好多人都怕受傷害 , 但係同時又想同人交往 , 個個都想被愛 , 但自己唔想先付出愛 .
哈 , 講到呢度 , 突然令我諗起耶穌基督降生 , 宣揚愛既訊息 , 咁電腦話就話拉近人與人之間既距離 , 實際係令人更加疏離 , 咁咪同基督教既教義背道而馳 ? 唔怪得有人話 “敵基督” 就係電腦啦 . 不過 , 係咪 “敵基督” 我就唔敢講啦 , 我又唔係個d神學研究既人 .
記得N年前有個教會姊妹生完仔 , 我去探佢 , 佢好勞氣同我講 : 我都唔明你地D年輕人諗乜 , 比一個朋友出賣過 , 就封閉自己 , 唔再同人溝通交心 , 費時受傷害喎 . 你話幾蠢 . 值唔值得為左一個人 , 仲要係傷害過自己既人而令到自己無晒朋友呀 ? 我當時尚且年輕 , 但未試過比朋友傷害 , 就算害左我又唔知 , 我沒有考究佢係咪患左產後狂燥症 , 不過呢一番話又講得好啱 .
大家都渴望愛 , 但又唔想因付出左愛竟換來傷害 , 於是大家變成想被愛先 . 試諗下 , 大家都希望先被愛後愛人 , 始早供不應求 , 到時誰來愛你 . 愛過受到傷害又如何 ? 世界好公平 , 傷害過你的人以後永遠都得唔到你既愛 , 何必為左一個傷害自己既人 , 攪到自己連愛都無埋 , 咁蠢既 ? 大家唔好再靠電腦找尋愛了 , 要記住 , 熄左電腦之後 , 電腦既電源無左 , 愛既供應亦會無埋 . 仲唔起身打個電話約個老死出黎見下面 , 彼此愛愛對方 , 咁你想要既愛同對方又想要既愛 , 先至可以sustainable development (可持續發展) .
節目主持
比亞零六
200605190036
