呃飲呃食上天家---第十七集 愛．可持續發展Sustainable Love (羅馬書十二章17-21節)
羅馬書十二章17-21節話 : 不要以惡報惡；眾人以為美的事，要留心去作，若是能行，總要盡力與眾人和睦。親愛的弟兄，不要自己伸冤，寧可讓步，聽憑主怒；因為經上記著：主說：『伸冤在我，我必報應。』所以，你的仇敵若餓了，就給他吃，若渴了，就給他喝；因為你這樣行，就是把炭火堆在他的頭上。你不可為惡所勝，反要以善勝惡。（註：「把炭火堆在他的頭上」意為：用愛心對待仇敵，可能會把他帶到悔改的地步。）
令我諗起上集提到 : “世界好公平 , 傷害過你既人以後永遠都得唔到你既愛……” 呢一點 , 我發覺自己講錯左 .
好多人提到 “愛仇敵” 呢三個字 . 大家拿拿聲耍手兼擰頭 , 大聲話無可能 . 雖則愛仇敵 , 就正如將炭火堆在仇敵既頭上 , 之但係呢個世界既人心越來越硬 , 個仇家有冇可能咁容易比你感動呀 . 我起初同大家想法完全一致 , 不過小弟親身經歷之後 , 原來呢段經文未必係改變個仇家 , 而係改變自己 .
話說小弟做野個度有個Susan(衰神) , 當年佢為左要升校長位 , 竟然陷害我同另一個同事 . 呢件事 , 我嬲左足足一年 , 個一年我勁想攞刀劈死個Susan .
後來我轉左工 , 我仲有火 . 後尾我睇到呢節經文 , 當時我同大家一樣嗤之以鼻 , 仲同神講 , 有冇可能呀 , 吹水呀 . 個一年 , 我聽返d舊同事講 , 佢比校董會black list左 , 成世都唔駛旨意升職 , 我個心不知幾涼 , 抵死呀 , 仲覺得未夠折墮 . 無耐我靈修個陣時 , 再讀到呢段經文 , 我就由心涼變成心寒 . 點解 ? 因為經上說 : “主說 : 伸冤在我 , 我必報應.” . 咁即係話---對於我 , 主已經聽我禱告 , 但係我呢 ?
一年之後 , 我返番入去做 , 個Susan仲響度又未死 . 佢第一日見到我 “嘩鬼回魂” , 個樣有d愕然 . 講真 , 我都擔心自己點樣去面對個Susan , 嬲佢 ? 自己辛苦 ; 唔嬲佢 , 我怕過唔到自己個關 . 於是我同上帝講 , 我就試下羅馬書呢段經文係咪work . 而呢一年 , 我同佢有講有笑 , 建立番一個普通同事既關係 . 結果 , 我就更加學識左羅馬書既道理 .
嬲人其實好辛苦 , 愛人反而仲易 . 好似個Susan咁 , 佢既言行同氣焰 , 跟一年之前沒有變 , 我完全知道佢係放唔低升唔到職呢件事 , 尤其係新校長講野個陣時 , 佢個樣好不屑 , 好耿耿於懷 . 我起初以為自己心病未癒 , 於是我又問下一d新同事 , 原來佢地都有同感 . 見佢每日都頂住條中氣返工 , 又頂住條中氣收工 , 我見到都戥佢辛苦 .
至於自己 , 今年我對住佢 , 雖則我唔敢講心性跟行為上 , 完完全全遵照羅馬書呢段經文咁做 (我今年仲同佢改左個名做 “蛇妖” ) , 但至少有時見到佢唔係好妥 , 或者病假返黎 , 我都有走埋去問候下佢 , 若果換轉係上年 , 我就真係用粗口問候佢或者趁佢病攞佢命喇 . 後來才發覺原來愛仇敵唔係咁難 , 至於佢受唔受我唔知 , 但起碼自己既心情放鬆左好多---個炭火唔係堆係自己頭上 .
我諗愛仇敵唔係一定要攬住佢 , 或許只係一個噓寒問暖既說話作開始 , 大家關係已經改善 , 或者冰釋前嫌 . 至於你既仇敵受唔受已經毋須理會 , 因為自己可以在愛中成長 ; 最重要係 , 你連仇敵都愛 , 當然更加愛錫自己既親朋戚友 , 相由心生 , 你咁可愛 , 一定得到比其他人更多既愛 .
