唔好意思 , 遲左五個月先至推出新一集 , 我活該 .
呃飲呃食上天家---第十八集 基督徒的謊言
以下是我兄弟中田誠既親身經歷：
１－話說有個住係元朗既中產女人帶住個仔山長水遠去將軍澳一青年中心參加小提琴班（其實都唔知為乜），第一日自己早到左，就話要入去上堂，中心職員話比佢知要夠鐘先得，個女人話：唔係早Ｄ黎早Ｄ上咩？（無腦既，晨早六點幾黎呀，笨！）
２－跟手自己跟個仔入去上堂又無同職員講（基本上沒有知會，家長係唔可以跟住入上堂），仲係班房裡面係個仔面前，大大聲聲指摘個導師無禮貌。（個導師Ｒ晒頭唔知仲乜）
３－無理地指摘中心職員同導師，最抵死係講左三句人神共憤既說話：
Ａ我係基督徒，係唔會講大話；
Ｂ我同我屋企人都係專業人士，我地會去報館投訴你地。
Ｃ我會教個仔要尊重老師（呢句擺明吹水，自己身教同言教都做唔到，個仔重會唔會聽你支笛呀？無睇廣告呀－“有樣學樣，我地係一家人黎呀嘛”）
身邊見過唔少Ｄ所謂專業人士、中產階級，有Ｄ學識、有Ｄ社會地位同埋幾個臭錢，就響度也文也武。講到自己好巴之閉，好理直氣壯，實情係以最佳口才編造最多謊話，最慘就係用基督教做擋箭牌。仲乜啫，家下基督教個名好好用咩？好似事件中個師奶咁，口口聲聲話自己係基督徒，証明呢？又話自己係基督徒唔會講大話──呢句已經係大話啦！邊個夠膽話自己唔會講大話呀？聖經係教我地唔好講大話，但係唔代表自己真係唔講大話呀，人類。自己有冇講到大話，心照啦！
另外近排我發覺有兩句說話令我覺得好可悲，就係一Ｄ借基督教名義做衰野既人成日講“我地Ｄ基督徒係唔會講大話．”之後，就有大量未信既人講“你地Ｄ基督徒唔係唔講大話架咩？” 呢兩句野好似惡性循環咁，搞到Ｄ好屬靈既好好基督徒（唔係我呀！）十分無奈！
“你地Ｄ基督徒唔係唔講大話架咩？”喂！基督徒同普通人有乜分別先，搵支針拮出黎Ｄ血藍色架？我再重申一次，聖經係教導我地唔好講大話，做得到當然好；做唔到就要悔改啦。但係唔代表信左基督就即刻唔講大話，點解次次都將講大話同基督教劃上不等號呀？佛教道教天主教回教印度教東正教神道教呢Ｄ信徒講大話就得既，係基督教唔得，我地呢Ｄ信徒一講大話就必死既，要拎去釘十字架既，嘩！好唔公平啫！我唔係比藉口自己，但係我地Ｄ基督徒在世一天，一樣係罪人，同樣仍然有犯罪，之但係上帝透過聖靈賜比我地有省察既心，提醒自己唔好一錯再錯啫；嘩，一錯左就咁樣篤法，駛唔駛呀！
而另一句係“我地Ｄ基督徒係唔會講大話．”我敢肯定，講得出呢句話個Ｄ多數唔係基督徒，只係借基督教去做埋Ｄ衰野！呢Ｄ人真係要拎去打靶！簡直係抹黑基督教。若果講呢句話既真係基督徒，佢就更加抵死嘞，竟然利用基督教名義去攻擊基督教，一定遭天譴！
不過後未同傳道人講開 , 佢話個d所謂基督徒既行為的確係阻礙人信耶穌。但想深一層，我地信耶穌既人，係信基督教呢個教，抑或係信耶穌既救贖呢？
如果只係睇基督教，的確有好多令人氣憤既事，但係我地信耶穌，就係睇到一個事實，你我都係有罪既人，要主耶穌既拯救，真正能有改變，並唔係因為我地有能力，毅力去變好，係我地願意將生命既主權交給神，由神去改變及帶領。
