唔好意思 , 遲左五個月先至推出新一集 , 我活該 .
呃飲呃食上天家---第十八集 基督徒的謊言
以下是我兄弟中田誠既親身經歷:
1-話說有個住係元朗既中產女人帶住個仔山長水遠去將軍澳一青年中心參加小提琴班(其實都唔知為乜),第一日自己早到左,就話要入去上堂,中心職員話比佢知要夠鐘先得,個女人話:唔係早D黎早D上咩?(無腦既,晨早六點幾黎呀,笨!)
2-跟手自己跟個仔入去上堂又無同職員講(基本上沒有知會,家長係唔可以跟住入上堂),仲係班房裡面係個仔面前,大大聲聲指摘個導師無禮貌。(個導師R晒頭唔知仲乜)
3-無理地指摘中心職員同導師,最抵死係講左三句人神共憤既說話:
A我係基督徒,係唔會講大話;
B我同我屋企人都係專業人士,我地會去報館投訴你地。
C我會教個仔要尊重老師(呢句擺明吹水,自己身教同言教都做唔到,個仔重會唔會聽你支笛呀?無睇廣告呀-“有樣學樣,我地係一家人黎呀嘛”)
身邊見過唔少D所謂專業人士、中產階級,有D學識、有D社會地位同埋幾個臭錢,就響度也文也武。講到自己好巴之閉,好理直氣壯,實情係以最佳口才編造最多謊話,最慘就係用基督教做擋箭牌。仲乜啫,家下基督教個名好好用咩?好似事件中個師奶咁,口口聲聲話自己係基督徒,証明呢?又話自己係基督徒唔會講大話──呢句已經係大話啦!邊個夠膽話自己唔會講大話呀?聖經係教我地唔好講大話,但係唔代表自己真係唔講大話呀,人類。自己有冇講到大話,心照啦!
另外近排我發覺有兩句說話令我覺得好可悲,就係一D借基督教名義做衰野既人成日講“我地D基督徒係唔會講大話.”之後,就有大量未信既人講“你地D基督徒唔係唔講大話架咩?” 呢兩句野好似惡性循環咁,搞到D好屬靈既好好基督徒(唔係我呀!)十分無奈!
“你地D基督徒唔係唔講大話架咩?”喂!基督徒同普通人有乜分別先,搵支針拮出黎D血藍色架?我再重申一次,聖經係教導我地唔好講大話,做得到當然好;做唔到就要悔改啦。但係唔代表信左基督就即刻唔講大話,點解次次都將講大話同基督教劃上不等號呀?佛教道教天主教回教印度教東正教神道教呢D信徒講大話就得既,係基督教唔得,我地呢D信徒一講大話就必死既,要拎去釘十字架既,嘩!好唔公平啫!我唔係比藉口自己,但係我地D基督徒在世一天,一樣係罪人,同樣仍然有犯罪,之但係上帝透過聖靈賜比我地有省察既心,提醒自己唔好一錯再錯啫;嘩,一錯左就咁樣篤法,駛唔駛呀!
而另一句係“我地D基督徒係唔會講大話.”我敢肯定,講得出呢句話個D多數唔係基督徒,只係借基督教去做埋D衰野!呢D人真係要拎去打靶!簡直係抹黑基督教。若果講呢句話既真係基督徒,佢就更加抵死嘞,竟然利用基督教名義去攻擊基督教,一定遭天譴!
不過後未同傳道人講開 , 佢話個d所謂基督徒既行為的確係阻礙人信耶穌。但想深一層,我地信耶穌既人,係信基督教呢個教,抑或係信耶穌既救贖呢?
如果只係睇基督教,的確有好多令人氣憤既事,但係我地信耶穌,就係睇到一個事實,你我都係有罪既人,要主耶穌既拯救,真正能有改變,並唔係因為我地有能力,毅力去變好,係我地願意將生命既主權交給神,由神去改變及帶領。
1 則留言:
Happy New Year!!^_^好耐無睇過你d文章,新一年有新文章真好。你文中提及o既師奶,家下周街都係啦!你位朋友係咪向基督教中心做野呀?係o既話亞師奶都係入鄉隨俗o者,話自己係基督徒係諗位想同大家friend下,講唔講大話o既野其實好空範,佢認為自己唔會咪唔會囉!基本上帶得個小朋友去學咩學o既師奶,都自以為自己升左級係高檔人。好似我家附近間百佳超市,d亞太拎張"金"咭出黎畀錢就以為自己係貴人,我見到佢地個咀臉就想扯巴佢,我身全部都有金色啦!有咩咁大不了,你估唔使找咭數呀!低能!
剛過的上星期六,我便遇到一位都似你朋友遇到的那位"吹水"師奶,話說我地一行十六個人,去到間餐廳食晚,諗位提早慶祝07到訪。餐廳地方雖少,但還分開了吸煙與非吸煙區,雖然我係煙民,但都識尊重人,所以唔介意坐非吸區,但可惜地方太細,當日又有好多一家大小出黎食飯,非吸區爆棚,侍應小姐問我地介唔介坐吸區,一位嚴守不吸煙友人就去巡視環境後,都覺得可以一坐,咁大家就快快樂樂走去坐啦!坐下無耐,侍應帶住位年紀可能同我差唔多、身穿"以為"好高貴服飾o既師奶入黎我地個邊,佢地邊行邊講野(唔知佢地講咩!)我見佢一身舉動都係巡場多,後黎行到我地隔離位,我就聽到佢問侍應:無其他位啦?我唔食煙喎!侍應好有禮貌回應:唔好意思,無啦!若果你要依家有位,就只有吸煙區,若你不想坐的話,謂有再等一下。亞師奶聽完就好大聲話:我係李太喎!你咩態度呀?侍應無奈,但我忍唔住大笑左一聲,亞師奶好爆咁望住我,我都忍唔住串左佢一句(但我唔係望住佢,係對住d朋友講)李嘉誠老婆呀?就唔好黎d咁地方啦!我班朋友個個爆笑(大好日子應該要歡樂下嘛!),跟住佢無駁我,但就走埋去一群年青人身邊,話:香港已經實行左禁煙啦!你地咁樣係犯法。我見個侍應忍唔住都笑左一下,一群年青人就好團結,齊聲話:你有無睇報紙呀?07年先開始呀,依家係06年。亞師奶火到黎,估然大爆話:我坐就坐向度,你地全部人最好唔好食煙啦!佢唔講lee句都唔使死。坐我對面的班亞太(佢地年紀都有番咁上下),其中一位亞太突爆粗,@!#$@#$$%&^^&*,調理番亞李太全家,o下!個下個個心到涼哂!亞師奶當然氣沖沖就左去啦!
當晚我地個話題,大半都要多得個位師奶。
車露事
發佈留言