呃飲呃食上天家－－ 第廿六集《五十日同行世界》第6節

一次面試，筋竭力疲。我好似受左重傷既拳手，倒臥係軟墊上深層昏迷。

呃飲呃食上天家──第廿六集　五十日同行世界
　　　　　　　　　第六節　與我常在

用左一日時間，我冷靜落黎──我話得個男人打正天主教旗號做埋ｄ衰野，咁打正基督教旗號既我又係修養立品事奉傳教工作上面做得好咩？我話得人又有冇反省自己呢？如果我真係咁尊敬聖方濟各堂個位老先生，當正大家都係一家人同負一軛既話，我又何嘗唔係破壞個位老先生傳教事奉工作？

冷靜過後係更重既係憔悴──我靜靜咁走到我神既跟前，我道歉──道歉唔係因為我鬧佢，而係自己由此至終太過分。明明自己只係祈求有一次面試既機會，主答應左我，之後所發生既，一切都係自己貪心，想再多ｄ再多ｄ而落得咁既下場，我又怪責邊個呢？主聽左我既禱告，我又咁對佢，我同個ｄ因唔合自己心意而離開神既人有咩分別呢？

身邊既朋友同我講世界上其實唔只佢一個衰人，無論咩國籍咩宗教都有賤人當道。我無理會朋友係咪好言安慰，但係令我知道，點解我對個中坑會咁慶──原來我三十一年黎，我無遇過ｄ咁既人，就算以前遇過既衰人都無呢個中坑個品咁差；更重要係三十一年黎，身邊既朋友對我十分之好，好保護好遷就好愛護我，我有事個個都會為我出頭出聲出面，只係我身在福中不知福。

憔悴期個三數天，我好沉；但我沒有放棄祈禱，只不過唔係為自己，而係為仲未搵到野做既朋友祈禱，希望早日搵到野做，好得意，佢地真係相繼搵到工；同樣我為到一位傷左腳入左醫院既小兄弟祈禱，點知唔駛一個禮拜佢出左院。原來主一直無離開過我，我咁衰仔都聽我禱告，為我將
一切困鎖既事挪開，靜靜咁比我休息，陪著我。

我好記得自己係最嬲個時講過一句現實既說話，就係朋友問我如果間天主教學校請你你做唔做，當時我回應：「唔做。但我無第二間揀，為左生活，我會做。有得揀，一定唔做。」連志氣都洩埋。但當然自己都有底線，就係人工太低唔合理一定唔做。

第二次面試過左兩日，個間學校打比我話請我，可惜出價太低，比起薪點更低不特止，仲要代課廿日人工都高過佢，我曾經bargain過，唔成功，結果無合作。我有ｄ唔開心，因為朋友都知我出身到依家都係個ｄ死做難做格，點知今次第一次推工。但有三件事令我好安慰，兼且個人輕鬆返ｄ：
第一，其實今次係求職成功，因為佢請我，只係我唔做；
第二，我阿爸阿媽竟然十分支持我，原因係幾年前一次搵工失敗，比佢地係咁話我，其實我都怕同佢講我未搵到工就推工，費時比佢地又話啦，真係估唔到佢地咁支持我，仲出口鬧間學校；
第三，上帝知道我唔想做呢間學校，太多唔愉快既經歷，但為左生活又要迫去做，同時佢知我人工有底線，於是利用呢條底線幫我推左份工，亦都省卻左我情緒低落個時仲要我左諗右諗，坦白一句，當間學校開出條件到我開口拒絕，我第一次強烈感受到呢個係上帝特登安排。

「足印」歌詞講：
每次我心中多悲傷，祂怎卻遠去剩我獨行；每次我感到是寂寞，祂怎卻遠去剩我孤單；
默默地在我身邊的主，跟我低聲輕輕說出；「在絕望路裡的一雙，原是我的足印。」

回望我過去多少的失意，但你每次每次也在旁，是你抹我淚痕，是你揹我經過，
明白到有你居於心深處，我不再是獨行，前路有你共行，留下雙雙足印。

上帝真係如我同在。

比亞零八
200809140145