呃飲呃食上天家－－ 第廿六集《五十日同行世界》第5節

上帝愛我，雖然小弟又野蠻又無賴又犯賤又貪得無厭，但係──上帝．仍然．愛．我。

呃飲呃食上天家──第廿六集　五十日同行世界
　　　　　　　　　第五節　與天主教正面交鋒第二回

唔駛一個禮拜，個間天主教小學call我第二次面試。我開心到差ｄ暈低，我仲同ｄfriend講，如果臨門撻Ｑ既話，我應該要自殺。於是我又花左半天既時間去預備second in.，當然又少了時間預備第二科考試。

面試當日，我帶齊所有個人資料，心情好緊張，最抵死係校長話校董仲未到，要等多一陣，wait──點解多左個校董架，上次無講架。於是我求上帝與我同在。

一等等左四十五分鐘，一入會議室，校長立即同我say sorry要我久等之類。Wait，係個校董遲到，校長你仲乜道歉呀？校董大晒呀？算！大人不記小人過。

個校董係一個中年男人有ｄ霸氣，一開波佢就話我唔係一個合資格教師，因為我張教育文憑有問題喎，我Ｏ晒咀，坦白我得六年年資，睇佢個樣年資深過我，可能有問題我真係唔清楚，於是我以後輩身份同語氣詢問佢，比到位佢上喎，佢自然而然咁貫徹「大支野」姿態教我呢個後輩。點知，講左十五分鐘，佢先發覺自己講錯野，再問返我讀左幾耐，我話比佢聽一年full time，佢就同校長講佢攪錯左（唔係同我講），兼且仲要插我仲乜唔寫清楚係履歷度，我話比佢聽已經寫左係師資訓練一欄，佢先無聲出（不過都係無道歉）。十五分鐘裡面起初我覺得自己被佢「技術性擊倒」輸1:0比佢，但係後半場佢完全「露底」──又遲到又唔睇唔清楚ｄ野又無禮貌，完全係水蟹充大閘蟹，死開啦！

打後半個鐘，完全被佢「禁住打」，又話我呢話我路，鬼叫我黎求職呀──成場個比數越拉越開。

到講到天主教問題，我終於開心返ｄ，因為我可以將我既信仰我間教會同我既工作連埋一齊。點知個中坑仲黑人憎：「你間教會係邊？」我如實作答。佢以輕佻既態度問：「即係樓上教會啦！你間教會都唔係好大啫。」我話係。佢就講喇：「大教會就知道架喇，你細教會就講清楚啦，我地天主教……」我聽到呢度，我已經好慶好慶（我勁想一拳打爆佢個咀，兼且用刀係佢籮柚界十字，等佢上巴士有位都坐唔到）──家下細教會有乜問題？細教會就一定歧視其他宗教？細教會一定無知呀？家下一定係大教會先明事理咩？仲乜要睇小我間教會？我間教會細一定要受你歧視呀？

佢仲好笑，話唔係同我傳天主教喎。死開啦，我心諗，即使我唔係基督徒，我唔信耶穌，但見到係你傳教，我入邪教都唔入天主教！

其實，我對天主教從來無歧視，因為小弟係天主教幼稚園出身，兼且上次跟教會去拜訪深水埔天主教聖方濟各堂，好記得個位老先生好好人，即使我地係基督徒，都好溫文有禮（係我成世都學唔到個種nice），佢又好虔誠，用一生時間係教堂事奉，好關顧我個班少年人，係一個有品德有修養既前輩，佢仲話我地（基督徒同天主教徒）本來係一家人黎（讀過歷史都知）。所以我個一刻好尊敬佢，甚至有ｄ所謂基督教既前輩都唔及佢。點解？點解有呢條中坑摧毀我對天主教良好既觀感，破壞左個位老前輩窮畢生係教堂傳教事奉既工作！

踏出個間學校，我勁唔開心，我上到巴士即刻鬧上帝（係，我係鬧上帝）：天主教又係你睇，基督教又係你睇，仲乜天主教有ｄ咁既人呀？我第一次見工可以躂你個朵，點知係比人睇小，有冇攪錯！

提摩太前書4:12話：「不可叫人小看你年輕，總要在言語、行為、愛心、信心、清潔上，都作信徒的榜樣。」我同自己講，我一定要努力工作，係教育上創一番成就；仲有努力事奉，令到我間教會唔會比人睇小！我一定唔會衰比個死中坑睇！

比亞零八
200809140036