呃飲呃食上天家－－ 第廿九集 命大

本來今晚寫唔成第廿九集……

呃飲呃食上天家 --- 第廿九集　命大

成日睇人地ｄ死過翻生既經歷，見住條友聲淚俱下咁話要感謝上帝打救佢，我次次都諗「咁岩得咁橋啫，死好命駛唔駛下下都哈呢路也咁誇呀」。終於到自己出事～～～

話說今日年廿九，小弟一同以往咁抹晒全屋玻璃窗。到抹到自己間房喇，因小弟係訓地下，要抹窗先要將地下張床既墊褥拎走，但張墊褥係一塊過既，成六呎長，咁我好順理成章咁舉起佢，點知一舉，有舊野跌左落我個頭度鬼死咁痛，都未睇清楚係乜鬼跌落我個頭度，就聽玻璃粉碎既聲音，我當堂呆左，望清楚，原來係我盞房燈！盞房燈唔係有咩特別，同以前醫院後樓梯ｄ圓型橙黃色好暗既波波燈一樣，仲有一個波波玻璃燈罩。

我下意識就估到呢鑊甘喇，成個玻璃燈罩「哼」落個頭度，加上小弟係無頭髮做緩衝，仲要見個燈罩粉身碎骨既死相，呢鑊唔死都應該入瑪嘉烈宿營喇啩，我諗應該有至少兩道血從東西兩邊向下流，小弟小心翼翼咁摸下頭頂，免得有玻璃碎殘留頭頂而傷上加傷。
　　
感謝上帝！──賜予我呢個光頭仔一個鐵頭──我個頭頂竟然絲毫無損，純粹起左一個小瘤。我屋企人都立即替我檢查頭頂，證實只係腫左，沒有損傷或碎片。

小弟見到堆玻璃碎由房飛到出廳，真係猶有餘悸。你估我真係識鐵頭功咩，呢劑野如果出事，小弟至少要係醫院過年（大吉利是）；已經skinhead既頭頂要剷光縫針，仲要留多條疤痕兼且傷口以後寸草不生，呢鋪仲唔感謝主呀，真係。

PS不過小弟無哈里路也，因為我唔係好清楚呢句野點解，而且小弟用左成半個鐘先掃清晒ｄ玻璃碎（！-_-）

新一年祝大家福大命大！
節目主持
比亞零九
200901252046